Wednesday, May 5, 2010

परि स्मरते - कुसुमाग्रज

नवलाख तळपती दीप विजेचे येथ
उतरली तारकादळे जणू नगरात
परि स्मरते आणिक करते व्याकुळ केव्हा
त्या माजघरातिल मंद दिव्याची वात

वाऱ्यावर येथिल रातराणि ही धुंद
टाकता उसासे, चरणचाल हो मंद
परि स्मरतो आणिक करतो व्याकुळ केव्हा
त्या परसामधला एकच तो निशिगंध

हेलावे भवती सागर येथ अफाट
तीरावर श्रीमान इमारतींचा थाट
परि स्मरतो आणिक करतो व्याकुळ केव्हा
तो नदीकिनारा आणि भंगला घाट

बेहोष चढे जलशांना येथिल रंग
रुणझुणता नूपुर जीव बने निःसंग
परि स्मरतो आणिक करतो व्याकुळ केव्हा
तो आर्त मला जो ऐकविलास अभंग

लावण्यवतींचा लालस येथे विलास
मदिरेत माणकापरी तरारे फेस
परि स्मरती आणिक करती व्याकुळ केव्हा
ते उदास डोळे, त्यातिल करुण-विलास

वरील कविता मंगेश नाबर यांच्या सहयोगाने अणि फरमाइशीवरून. धन्यवाद् मंगेश !
( Pari smarate aanik karate vyakul tevha )

2 comments:

  1. मनःपूर्वक धन्यवाद, श्रीमान शंतनू देव. आपण मला हव्या असलेल्या या कवितेची सर्व कडवी सादर केलीत. याचबरोबर या कवितेला तशीच सुंदर चाल लावून सी.रामचंद्र यांनी गायिलेले गीत अपेक्षित होते. माझी ही मागणी पूर्ण कराल काय ?
    मंगेश नाबर.

    ReplyDelete
  2. सुंदर ब्लॉग आहे. संग्रह सुद्धा उत्तम.
    गंगाधर मुटे

    ReplyDelete

Please comment. Your review is very important for me.